Fulham ta kulla yarjejeniya da Everton kan farashin dan wasan tsakiya Alex Iwobi.

Dan Najeriya, mai shekaru 27, yanzu zai tafi Landan ne domin a duba lafiyarsa da nufin kammala cinikin kafin a rufe kasuwar musayar 'yan wasa.

Iwobi ya buga wasanni biyu daga cikin ukun da Everton ta buga a gasar Premier ta bana, inda Toffees din har yanzu ba ta samu maki ko daya ba kuma ta zauna daram a kasan teburi.

Rauni ya hana shi buga wasan da Wolves ta doke Everton a gida ranar Asabar.

Ya koma kungiyar ne daga Arsenal a bazarar 2019 kuma ya buga wasanni 123 a gasar, inda ya zura kwallaye shida.