Prophecies, giving of directions and prayers na part of di cross-over service to di new year for many churches for Nigeria for many years now.

2024 no different as some religious leaders use di opportunity of dia cross over service to release new year prophecies concerning di new year.

Dis na some of di prophetic declarations from some of dem.

Pastor Enoch Adeboye prophecy

General Overseer, Redeemed Christian Church of God, RCCG, Pastor Enoch Adeboye wey pipo sabi as Daddy G.O give prophecy about individuals, Nigeria, health and economy.

Di pastor release im prophecies during di cross over service for Redemption City.

Adeboye say tins go dey beta for 2024 but e say make pipo no expect say di hardship for di kontri go reduce soon.

“Tins go dey a little hotter before e go beta,” Adeboye tok.

Adeboye also say medical breakthrough go dey across di world in di area of incurable diseases like cancer, asthma, among odas.

Adeboye also prophesy say opportunities go dey for pipo make dem gbab dis year.

“Some pipo go start as nobody but dem go become significant before di middle of di year, many opportunities go dey get ready to gbab dem,” Adeboye tok.

“Medical breakthrough in di area of incurable diseases like cancer, asthma, etc.”

Bishop David Oyedepo

During di crossover service for Canaanland for Ogun state, Bishop David Oyedepo of Living Faith Church tok say God go bring im pipo into good fortune wey dem bin dey wait for all dia life.

Oyedepo say, "e go mark di end of misfortune for your life!’

“E go be your Isaac-order of year; your year of enviable turnaround!

“E go be your year of spiritual breakthrough wey go set di pace for oda breakthroughs for your life!

“E go be your year of uncheckered enlargement!”

Pastor D.K Olukoya:

Dr Daniel Olukoya na di General Overseer of di popular Mountain of Fire and Miracle Ministries.

Olukoya during di church annual cross over service for Monday say 2024 na ‘speedy and troublesome year.’

Di pastor list 14 prophecies for 2024, and some strategies for survival and breakthroughs 2024

Dis na some of di top 7 prophecies:

Dia go be plenty to rejoice about, and dem go be plenty to worry about. Na a hydra-headed year. A positive and negative mix! All di events from 2023 go enta dis year, and more go dey added. In addition to wetin already dey on ground, we must take spiritual strategic action
Na troublesome year, but e no pass spiritual control.
If you stop to dey fight dis year, you start to dey lose. If you reduce di temperature of your fire, di enemy go enta.
Na speedy year. You go need to resist your weaknesses and strengthen your strengths so God go fit move you forward in a new way.
Dis na di year to get your spiritual life on serious fire.
Pray, command, decree, and prophesy if you need to, but dis year, give no place to di devil. Do wetin dem dey call overkill.
No involve yourself for trial-and-error kind of endeavours. Find out wetin God want make you do.
Fortification Keys And Strategies For Survival And Breakthroughs for 2024 according to Pastor Olukoya include:

To increase prayer and fasting temperature
To live life of uncompromising holiness—holiness within and without.
To possess di spirit of di fighter.
To dey addicted to di Word of God.
To take evangelism much more seriously dis year.
To emulate Jesus Christ by engaging in regular retreats (Luke 5:16).
To understand how God dey follow you tok.

Prophet Joshua Iginla

Di founder of Champions Royal Assembly, Prophet Joshua Iginla release im prophecies during di cross over service for Abuja.

Di pastor tok say for im vision im see Russia, India, Brazil, China, and South Africa form alliance wey go dey strong and dis go change western power between 2024 and 2030.

Also, Iginla say G7 kontris like Canada, Germany, UK , USA, Japan and oda go experience backlash against poor economic policies so make dem dey careful.

Im say cryptocurrency go grow big and take anoda turn, between 2024 and 2028.

Meanwhile, Iginle tell President Bola Tinubu, make im dey careful of betrayal dis new year.

”President Tinubu go focus on im health to prevent medical emergencies twice. We pray make God agenda for am come to pass," Iginla tok.

”Tinubu mean well but make im dey careful of those wey im dey rely on, as I see faithful pipo go become unfaithful and betrayals. Friends before fit become enemy today."

Men of God predict katakata for 2024 election despite IGP warning against doom prophesies on 31st watch night

Some men of God for Ghana also make plenti predictions for di new year 2024.

Some of dis preachers don tok say di kontri go see katakata for di election year.

Dis na despite say di inspector general of police Dr George Akuffo Dampare don warn dis pastors against doomsday prophecies wey go fit cause “fear and panic”.

For one statement di police release, dem tok say dem wan remind “di religious community of di law on publication of false news”.

Di police warn say make “di religious and faith-based groups practice dia prophecy communication within di law of di kontri.”

But as e don become di norm for every 31 December, di pastors go ahead with dia declarations.

Apostle Dr Isaac Owusu Bempah

Apostle Isaac Owusu Bempah wey for sometime na im be di President of Ghana im pastor.

Over di years, im don dey make prophecies for 31st watchnight service.

For dis latest one, im prophecy many tins including:

Confusion and bloodshed for 2024 elections for di kontri
Confusion for di military, wit bloody outcomes
Death of one big religious leader
Leader of one political party go die wit national mourning
Coup go fit happun
Misfortune go happun for one big musician wey get impact for di kontri
Plenti fire outbreak for pipo dia houses, companies and stores from electric and gas wahala.
Increase for occult practices sake of economic wahala
Increase for homosexual activity, some gospel musicians and preachers go lead di recruitment
Popular football star go die wey go shock di world
Dis na some of di prophecies wey don comot for Apostle Owusu Bempah im Glorious Word Power Ministries International church on 31 December.

Prophet Nigel Gaisie

Prophet Nigel Gaisie also prophecy say opposition NDC go win elections and odas.

Di founder of di prophetic hill chapel for Accra during di watch night prediction include.

2024 be generally good year for pipo and di kontri
China den America don discover cure for one deadly disease
Flooding for part of New York wit plenti deaths
Deadly disease go emerge for America
Unexpected kontri go win AFCON for Ivory Coast
One West African president go suffer from poison attack
Deputy finance minister go rise to di highest level for goment
Plenti ants don chop di NPP flag
Dem don take President of Russia im seat
Coup go happun for French-speaking west Africa kontri
Di opposition NDC go win di 2024 election despite kasala wey go happun during di process
Dis prophets don tok say as God reveal to dem, e mean say dem for pray make di bad tins no happun for di kontri.

“We for intensify wanna prayers as citizens so say some of dis Wahala no go happun.”

E no clear wetin di IGP go do about dis latest prophecies by di men of God.

For many years you have heard prophecies over your life as you entered the new year and you exited without fulfillment..
The Lord says to tell you,2024 is different..
It shall be the most outstanding year of your life..
Don’t listen to negativity as touching this year..
The…

— Apst Johnson Suleman (@APOSTLESULEMAN) January 1, 2024

For Apostle Suleman, di founder of Omega Fire Ministries, 2024 go be different year.

“E go be di most outstanding year of your life,” Suleman tok.

"No listen to negativity as touching dis year. Di anointing to make dis year easy come upon you right now. HAPPY NEW YEAR.” E tok.