BBC Pidgin of Tuesday, 16 July 2024
Source: BBC
Gareth Southgate don officially resign as di manager of England football team.
Dis na di end of eight year reign as di Three Lions manager, afta e bin first take di role permanently for November 2016.
For dat time Southgate lead England go di finals for Euro 2024 and Euro 2021, di semi-finals of di 2018 World Cup and quarter finals of di 2022 World Cup.
E tell fans from di Football Association website say, “as proud Englishman wey I be, na di honor of my life to play and manage for England. E don mean everitin to me and I don give am my all."
“But time don reach for change and new chapter. Sunday final for Berlin against Spain na my last game as England manager.”
Gareth Southgate also chook mouth on top all di players wey im don manage since e become England manager.
E say, "I join di FA for 2011 wit ginger to improve English football. For dat time, including di eight years as England men's manager, I don dey supported by some brilliant pipo wey get my heartfelt thanks."
E tank im assistant coack Steve Holland wey im call one of di most talented coach for im generation.
E bin also add say, "I bin get di privelege of leading large group of players for 102 games. Evri one of dem bin dey proud to wear di three lions shirts.
"Di squad wey we carry go Germany dey full of exciting young talent and fit win di trophy of our dreams."
E also drop work for di supporters wey im call di best fans for di world,
E say, "I be England fan and always go be. I dey look forward to watch and celebrate as di players kontinu to create more special memories and to connent and inspire di nation as we sabi say dem fit."
How Southgate don perform as England manager
Gareth Southgate don manage England total of 102 times wit 61 victories, wey put di win percentage for 59.8%. Di remaining 41 games nko, England draw for 24 of de mand lose only 17 matcjes.
Southgate na number three for all time victories as England manager and na only two former England managers don win pass am.
Di two times wey England enta European Championship na under Southgate.
As one of di managers wey don manage ova 50 England matches, e get di third highest win percentage.
In di 102 matches wey e coach, Gareth Southgate use 99 different players between im first match for October 2016 and im last match on Sunday.
Wetin pipo dey tok on top Southgate exit
Some players like Jude Bellingham bin share di tori say Southgate dey comot for social media while odas don share wetin dem tink on top di mata.
Former One Direction member, Lois Tomlinson say, "thank you Gareth Southgate for di incredible memories wey you don give us for di last 8 years."
England goalkeeper Jordan Pickford wey play for di two Euro finals under Gareth Southgate tell am for statement for social media say, "I wan say special thank you to di boss say im always believe on me during im time wit us nad I go like to wish am di best for im next steps."
England and Arsenal midfielder Declan Rice wey bin play all di games for di Euro 2020, the 2022 World Cup and Euro 2024 under Gareth Southgate write for Instagram story say, "Thank you gaffer. Na privilege to play for England under your guidance. Memories wey go stay wit me forever. All di best for your next adventure."
How di FA go move on afta Gareth leave
Football Association CEO release statement wey im thnak Southgate for di work e don do for di team.
"For di 25 tournaments afta 1966 bifor Garth take charge we don win seven knockout games. For im four tournaments we don win nine."
E also hail Gareth add say "bifor Gareth, di longest wey we don dey top five for di world na seven months. For im tenure, we don dey dia for six years."
E don add asy di searck for England new manager don start.
Tori be say di search for new manager go rise even pass just English managers