Di Edo State governorship election tribunal go deliver judgement for di election matter wey Asue Ighodalo of di Peoples Democratic Party (PDP) bring against Monday Okpebholo of di All Progressives Congress (APC), for di election wey bin hold for September last year.

Di Independent National Electoral Commission (Inec) bin declare Okpebholo winner of dat election wit 291,667 votes, while Ighodalo get 247,274 votes.

Olumide Akpata of di Labour Party candidate finish for a distant third position wit 22,763 votes.

However, Ighodalo allege say di election get plenty magomago and im no go accept di results, so e file di case bifor di tribunal.

Di tribunal bin start dia sitting for Benin, di Edo State capital, but dem later relocate to Abuja sake of violence by supporters of di two candidates for di election.

As e be now, di three-man panel of judges of di tribunal led by Justice Wilfred Kpochi, don set to deliver judgement dis Wednesday. Di oda two justices for di panel na Justice A. B. Yusuf and Justice A. A. Adewole.

For one interview wit BBC Pidgin shortly afta Inec announce di election result, oga Ighodalo tok say e dey very disappointed wit how di election take go.

"I dey disappointed sake of say I bin tink say we go get a good transparent and effective conduct of elections,"e tok.

"E con dey be like say we dey get di worst election for di history of our kontri wey happun for Edo state."

"I tink say dis fit be di worst election wey dem dey conduct in di history of Nigeria."