Oleksandr Usyk defeat Tyson Fury to retain im unified heavyweight world titles and prove im status as a generational great wit anoda close points win in dia rematch for Saudi Arabia.

Afta im inflict a first career defeat on Briton Fury by split decision in May, Usyk determination to win once again prevail for Riyadh Kingdom Arena - and e retain im WBA (Super), WBC and WBO titles.

Fury, 36, find success for di first half of di fight. Some of di more eye-catching shots come from di Morecambe fighter, but di volume of punches and cleaner work na from Ukrainian Usyk.

All three judges score am 116-112 to di 37-year-old champion.

Usyk, wey be Olympic gold medallist and former undisputed cruiserweight champion, extend im undefeated record to 23 pro wins.

"Im [Tyson Fury] na great fighter, na great opponent. An unbelievable 24 rounds for my career. Thank you so much," Usyk tok.

Na only Oleksandr Usyk don beat Tyson Fury wey be two-time world champion, and di two defeats na major stains on a record wey also consist of 34 wins and draw.

Fury leave di ring witout conducting interview, bifor IBF world champion Daniel Dubois climb in and call for a rematch wit Usyk.

A visibly frustrated figure in di moments afta dem read out di scorecards, Fury tok for backstage say im dey convinced e win di fight by "at least three rounds".

Superstar Usyk showcase elite level boxing

Di rematch wey dem call Usyk v Fury 'reignited', di sport two most technically gifted heavyweights serve up anoda classic and showcase elite level boxing.

Di Gypsy King bin dey for playful mood wit unorthodox ring entrance to Mariah Carey's 'All I Want For Christmas Is You'.

Dressed as Father Christmas, Fury bin still dey sport di bushy beard wey dem clear at a rules meeting afta protests from Usyk team.

Usyk march to di ring in super-quick time. Wearing a robe like warrior, e crouch for di corner to recite a prayer.

After 11-minute face-off on Thursday, Fury and Usyk pick up wia dem stop, dia eyes dey fixed on each oda as dem meet for di centre of di ring.

Best of era Usyk running out of opponents

Two close defeats by a fighter of Usyk calibre no point to a sharp decline in Fury ability. On anoda day, wit anoda set of judges, e fit be different result.

"I dey really disappointed. We gatz see wetin happun in di future for Tyson. I tink im bin dey in control, e box really well and get Usyk on his back foot," promoter Frank Warren tok.