US sprint star Noah Lyles beat Jamaica Kishane Thompson by five-thousandths of a second to win di Olympic 100m title wit ogbonge photo finish for Paris 2024.

Lyles beat im rivals for di second half of di race to win by di finest of margins for a personal best of 9.79 seconds.

Dat na di same time wey Thompson get, im bin dey lead for most of di race, but Lyles bin produce ogbonge finish to successfully begin im bid for a potential four golds for dis Games.

Di United States former world champion Fred Kerley bin take bronze in 9.81, to edge out South Africa Akani Simbine for di podium.

Afta a long wait behind di start line wit backdrop of dramatic music for tensed atmosphere for Stade de France, tori be say all eight finalists finish within 0.12secs of Lyles for di race.

Dat na di standard of di final - wey GB Zharnel Hughes and Louie Hinchliffe fail to reach - Italy reigning champion Lamont Marcell Jacobs run out of di medals and another Jamaican rising star, Oblique Seville, finish last in 9.91.

Afta eviritin all eyes focus on Lyles, di athlete wey shine for sports biggest stage and di man wey bin win three golds for last year World Championships, as im dey run to celebrate once di official result appear on di big screen.

Di 27-year-old repeatedly ring di victory bell wey dey by di side of the track afta im establish imself at di pinnacle of di sport, before im target oda success for di 200m and relay events.

"You no fit ask for a bigger moment," Lyles, wey bin dey seventh for di halfway stage, tell BBC Sport.

"I bin get to take every round as e be and I bin vex small afta di first round, so I come in wit plenty ginger and... I run 9.83 [for di semi-final].

"I hope say una like Noah becos I get a lot more coming!"

Lyles come from nowhere to win Olympic gold

Not until di big screen inside di stadium show di official results, afta a very long wait, bifor anybody know say Lyles win – im win sake of im last minute push and di way im dip im body for line – dat na how im claim gold.

Tori be say na until di very last metres for di eye-catching purple track wey im bin dey even in contention.

Lyles bin tie wit Letsile Tebogo for di slowest reaction time of anybody for di field, wit time of 0.178 notably down on Fred Kerley lightning 0.108.

Yet Tebogo go on to cross di line for sixth position, while Kerley only hold on for bronze.

"Lyles bin no even get medal 10 metres out. Im bin no get hope of winning," Olympic medallist Steve Cram tok for BBC TV.

Lyles bin dey last place wit 40 metres of di race gone.

By halfway im dey seventh.

But di 27-year-old hit im top speed of 43.6 kilometres per hour at 60 metres to enter medal contention, den close far better dan any rival to win di ultimate prize wit im very last stride.

Thompson, wey be di fastest man for di world dis year wit a best time of 9.77, maintain a lead from 30 metres inside di race, to 10 metres from di finish line.

Na di finest margins wey decide di outcome, as Lyles cover di distance between 80-90 metres in 0.84 and di final 10 metres in 0.86 - compared to 0.85 and 0.87 for Thompson.

"I bin tink say [Thompson] collect for di end. I go meet am as we dey wait, and say I feel say you get am, good going', and den my name pop up and I dey like 'oh my gosh, I am amazing'," Lyles tok.

"I go dey honest, I bin no dey ready to see am and dat na di first time wey I don eva tok am. I bin no ready to see am."

Reacting on narrowly missing out on gold, 23-year-old Thompson say: "I bin no dey patient enough wit myself to let my speed bring me come di line, for di position wey I know I for go, but I don learn from am."

Di drama for di head of di race inspire world records behind am.

Di finishing times for Akani Simbine, Lamont Marcell Jacobs, Tebogo, Kenny Bednarek and Seville na all records for fourth to eighth place finishers for a 100m race.

South Africa Simbine run a personal best for fourth and say: "Missing di medal by 0.01, actually really dey crazy, but yeah, I dey happy."

Lyles continue to deliver on im big ambitions

Lyles dey outspoken and belief say im get di on-track ability and off-track aura to replace Usain Bolt as di new superstar of men athletics.

Di American don show say all di tins wey im dey tok im fit back am up wen e matter di most.

Last year, Lyles become di first man since Bolt for 2015 to win a 100m and 200m world double, bifor im complete a golden treble for di 4x100m relay.

For di build-up to di Paris Games Lyles bin claim say im dey plan to add di 4x400m to those wins for di French capital, and im bin drop hints about im form wen im run a 100m personal best for London Diamond League last month.

But to repeat dat success for dis kain stage, under serious pressure - much of di pressure na self-imposed – na anoda thing entirely.

Wit dis victory, im now don become di first American to win an Olympic 100m title for 20 years, since Justin Gatlin for 2004, and im don put imself as di dominant male sprinter of di current generation.

Lyles a three-time reigning world 200m champion, go look to maintain im grip on di sport major titles for dat event, wey dey start on Monday.

If im do am, im go move a step closer to sporting immortality for im pursuit of a historic four golds for dis Games.