Vanessa Trump, di former daughter-in-law of President Donald Trump, recently make headlines as di new romantic partner of ogbonge golf legend Tiger Woods.

Di confirmation of dia relationship don spark widespread interest, especially Vanessa' past connection to Trump family and Woods' high-profile dating history.

Who be Vanessa Trump?

Vanessa Kay Haydon, but now dey known as Vanessa Trump.

Venessa na former model and actress. She dey stay for Florida United states according to reports.

She be di ex wife of Donald Trump Jr, and di two of dem get five children togeda. Dia marriage last from 2005 until dem finalise dia divorce for 2018. Since den, Afta di divorce Vanessa maintain low public profile, focus on her family and personal endeavours.

Relationship wit Tiger Woods

Speculation about Woods and Vanessa Trump dating first start on March 14, wen reports suggest say two of dem dey secretly see each oda since late 2024.

According to sources, dia relationship start shortly bifor Thanksgiving, Vanessa bin dey frequently visit Woods house on Jupiter Island, Florida.

Di two bin reportedly keep dia romance private, avoiding public appearances together.

On Monday, March 24, Woods officially confam dia relationship via Instagram.

Di 15-time major champion share intimate photos of di couple, im caption di post, "Love in di air, and life dey better wit you by my side!" Im further emphasize di seriousness of dia relationship, e add say, "We look forward to our journey through life together." Woods also request for privacy, im ask for respect for dia loved ones.

How dia relationship develop?

Initially, Woods and Vanessa Trump bin maintain a friendly relationship, dem bond ova parenting and shared interests.

However, dia connection begin grow ova time, bifor e graduate into romance. Tori be say Woods initially bin dey drag leg sake of im longstanding friendship wit President Donald Trump. But, dia chemistry grow, wey now don lead to dia current relationship.