By Kwesi Atta Sakyi

Wo yen den na akwagwir eguraa wo
Na woahye wo nyeben mu totoroto,
Wo yen den na egu woano sa na ehen
Wo nsa kutu aben,
Ana igyina Ekumpoano Ekumfi Asaafar
Reson asera yaayaayaw wo mpoano,
Hwe, Ghanaman rotwen wo ntoboa
Kenyann na sepew wo ho,
Megye wo tafer banyin mbom to wo nkyia,
Oko no nnye oko ba,
Ghana asetsena mu aye ntaampee, pitsi basaa,
Woaka nkongyaa ara a owode miyi,
Nkontaa ato bentum,
Wogye no obagwenbanyi,
Hwe, ama awosa egu me,Dom kokuankuma bi gyina ho,
Sunsum mu etumfo dom pepe akakabenfobi,
Nye hen ridzi esi,
Hon esi nkitsi awe ataa do
De wonye hen bedzi esi afee do,
Nnaaso, Nyame Kokoroko tantanpon remma ho kwan,
Atanfo abonfo no bedzi nkogu,
Osahen Obofo Michael na sor abofo dom
Pepe kukuankuma
Gyina pintsinn etwa wo ho ehyia

Gyina pintsinn wo w’anan do
Mma Nhimhim anaa nnya awosoawoso,
Ma woenyi do kere sor na hwe,
Wo mboa aben, wo konyimdzi wo
Nkonkonaa ha yi ara, wo sasrawdo,
Orenkyer biara wo ndwuma pa
Beda edzi, wo hia na amandzehu behera,
Ama amanaman ehu wo ndzinoa pa,
Hwe egyedzi de ewo kyepen,
Nyew, okwabran twa par a
Woma no mbo,
Eso okwabran dze ne nsa hye
Ne damirifa mu a ,obua da,
Edwuma dzen ma ahonya na kanko
Ndwuma pa tu hwam tse de eduhwam
Boaboa wo ho na tu anamon,
Wenyin (wine) bi wo ho
Se osabowkwanyi (drunkard) nom bi a
Orenbow ara da, eso oronto bahaw,
Eso okenyan n’ahoodzen mapa,
Ma otu sa mbordo,
Mema wo dem wenyin no bi
Osor nhyira wenyin a,
Dem saso na mema wo wenyin no bi,
Wenyin a nenyi aye kebirr na koyoo
De mogya, wonom no asa mbarimba,
Ansaana omaandam dze no ho reka ha no,
Megyina nananom ewuako anamu


Kanfo ma wo, si no ewur na tadua ma wo, orennkyer biara Ghanaman befa ne tam pa efura,
Ma w’abeye okrabohwe ama amanaman;
Amanaman rutu mpon,
Ghana so rutu anamon,
Fa me ye na keka wo ho,
Kuma biara nsuar,
Ghanaman adehyeman wo hen ebibirmu ha
So retaataa ne nan
Agye punkum ako enyim,
So wo adar mo mu yie, so wo tabon mu dzen.
Twa odoto sa no ko wo enyim,
Kwan tabon no mapa wo w’abetsir kodwiir mpoano,
Beebi mbre woaye tsinkonn no,
Se edze wimhen a,
Tu fa fuah no mu fow ko wimu koon no ho,
Beebi mbre nworaba, bosom na ewia wo no,
Fuw Ghana okor ntsaban do ko wimu,
Beebi mbre okor na mpete na nnoma
Asorotow bu dikyi no,
Ofarnyi Kweegya, Asebu Amenfi,
Nananom Oburmankoma, Oson na
Odapagyan, ye ma hom mbo na ko,
Mfantseman mfre yie,
Ghanaman mfre yie,
Yie mbra, twa amangye aba, akpe sia,
Nagode Allah

By Kwesi Atta Sakyi